3.1. Կատարողի իրավունքները
3.1.1. ստանալ համակարգի գործառույթի, միացման կարգի, վճարումների և սույն պայմանագրի պայմանների վերաբերյալ անհրաժեշտ տեղեկատվություն։
3.1.2. ինքնուրույն սահմանել իր լիցքավորման սարքերի սակագները, նվազագույն պահուստավորման գումարը, պարապուրդի վճարը, հասանելիության ռեժիմը և այլ կոմերցիոն պայմաններ՝ համակարգի տեխնիկական հնարավորությունների և օրենքի սահմաններում։
3.1.3. ստանալ վճարումներ իր մատուցած լիցքավորման ծառայությունների դիմաց՝ վճարային ենթակառուցվածքի կանոնների համաձայն։
3.1.4. դիմել Ագրեգատորին տեխնիկական աջակցության, տվյալների թարմացման, տեղադրության կամ տեխնիկական պարամետրերի ճշգրտման հարցերով։
3.2. Օգտագործողի իրավունքները
3.2.1. նախքան լիցքավորման սեսիայի մեկնարկը ստանալ ամբողջական և հասկանալի տեղեկատվություն սակագնի, վճարման եղանակի, պահուստավորման, հասանելի լիցքավորման սարքերի, պարապուրդի վճարի և օգտագործման հիմնական կանոնների վերաբերյալ։
3.2.2. օգտվել համակարգում ազատ, տեխնիկապես հասանելի և իր ընտրած չափորոշիչներին համապատասխան լիցքավորման սարքերից՝ սույն պայմանագրի և կիրառելի օրենքի պահպանմամբ։
3.2.3. դիմել Ագրեգատորի կամ Կատարողի աջակցության ծառայությանը տեխնիկական խնդրի, սխալ գանձման, վերադարձի, վեճի կամ անվտանգության խնդրի դեպքում։
3.2.4. իրականացնել սպառողի և անձնական տվյալների սուբյեկտի իրավունքները՝ Հայաստանի Հանրապետության պարտադիր կիրառելի օրենքներով սահմանված կարգով։
3.3. Ագրեգատորի իրավունքները
3.3.1. տրամադրել, սահմանափակել կամ դադարեցնել հասանելիությունը ծրագրային ապահովմանը, եթե առկա է պայմանագրի խախտում, անվտանգությանը սպառնացող ռիսկ, վճարման պարտք, տեխնիկական անսարքություն, կեղծ տվյալների ներկայացում կամ օրենքի պահանջ։
3.3.2. Կատարողի հետ համաձայնեցմամբ փոփոխել համակարգում լիցքավորման սարքի քարտեզային տեղադրությունը, տեխնիկական պարամետրերը կամ ցուցադրման ձևը, եթե դա անհրաժեշտ է ճշգրիտ ցուցադրման, անվտանգության կամ ծառայության պատշաճ մատուցման համար։
3.3.3. ուղարկել կողմերին ծառայության, վճարումների, տեխնիկական փոփոխությունների, անվտանգության, համակարգի թարմացումների, նոր ծառայությունների կամ հատուկ առաջարկների վերաբերյալ հաղորդագրություններ՝ ապահովելով օրենքով պահանջվող հրաժարման կամ նախընտրությունների կառավարման հնարավորությունները։
3.3.4. իրականացնել կանխարգելիչ, տեխնիկական կամ օպերացիոն աշխատանքներ համակարգի կայունության և անվտանգության համար, ներառյալ՝ սեսիայի դադարեցում, անսարք կայանի թաքցնում, մուտքի ժամանակավոր սահմանափակում կամ տվյալների ճշգրտում։
3.3.5. միակողմանի փոփոխել պայմանագրի ընդհանուր պայմանները, եթե այդ հնարավորությունը նախատեսված է պայմանագրով, և փոփոխությունները հրապարակվել են այնպես, որ կողմերը կարողանան հեշտությամբ, ամբողջությամբ և վերարտադրելի ձևով ծանոթանալ դրանց։
3.4. Կատարողի պարտականությունները
3.4.1. ապահովել լիցքավորման սարքերի օրինական տեղադրումը, շահագործումը, էլեկտրական սնուցումը, հողանցումը, հաշվառումը, պահպանությունը, տեխնիկական անվտանգությունը և պարբերական սպասարկումը՝ կիրառելի տեխնիկական նորմերի, արտադրողի հրահանգների և ՀՀ օրենսդրության պահանջների համաձայն։
3.4.2. համակարգում ճիշտ և արդիական լրացնել լիցքավորման սարքերի հասցեն, հզորությունը, կոնեկտորի տեսակը, հասանելիության ռեժիմը, սակագինը, վճարային տվյալները և Օգտագործողի համար էական այլ տեղեկությունները։
3.4.3. ինքնուրույն կնքել անհրաժեշտ բանկային, acquiring, վճարային կամ հաշվարկային պայմանագրերը և ապահովել հարկային, հաշվապահական, սպառողների պաշտպանության, լիցենզավորման կամ ծանուցման պահանջների կատարումը, եթե դրանք կիրառելի են իր գործունեության նկատմամբ։
3.4.4. չփոխանցել իր հաշվի մուտքային տվյալները երրորդ անձանց, չշրջանցել համակարգի անվտանգային մեխանիզմները և չկատարել գործողություններ, որոնք կարող են խաթարել համակարգի կամ այլ կողմերի աշխատանքը։
3.4.5. չհրապարակել Ագրեգատորի, Օգտագործողների կամ այլ կողմերի վերաբերյալ կեղծ, ապակողմնորոշող կամ գաղտնի տեղեկատվություն։
3.4.6. օբյեկտում, որտեղ տեղադրված է լիցքավորման սարքը, ապահովել էլեկտրական էներգիայի մուտքային ավտոմատի և հաշվառքի կետի վերահսկման ու պատշաճ աշխատանքի հնարավորությունը, եթե դա անհրաժեշտ է էլեկտրաէներգիայի կորուստների, անթույլատրելի միացումների կամ անվտանգության ռիսկերի կանխման համար։
3.5. Օգտագործողի պարտականությունները
3.5.1. խնամքով վերաբերվել լիցքավորման սարքին, կաբելին, կոնեկտորին, մեքենատեղին և հարակից գույքին, չվնասել սարքավորումը և չօգտագործել այն արտադրողի կամ համակարգի ցուցումներին հակառակ։
3.5.2. նախքան լիցքավորումը ստուգել կայանի, կաբելի, կոնեկտորի և ավտոմեքենայի լիցքավորման վարդակի արտաքին վիճակը։ Վնաս, կեղտ, այրման հետք, անսովոր հոտ, ջերմացում կամ այլ ռիսկ հայտնաբերելու դեպքում Օգտագործողը պարտավոր է չսկսել լիցքավորումը և անմիջապես տեղեկացնել աջակցության ծառայությանը։
3.5.3. լիցքավորումը սկսել և ավարտել միայն Հավելվածի, համակարգի կամ ավտոմեքենայի նախատեսված ֆունկցիոնալի միջոցով։ Արգելվում է հոսանքի տակ գտնվող կոնեկտորը հանել մինչև լիցքավորման սեսիայի պատշաճ ավարտը և հոսանքի մատակարարման դադարեցումը։
3.5.4. շտապ կանգնեցման կոճակը՝ EMO, օգտագործել բացառապես վթարային կամ ակնհայտ վտանգավոր իրավիճակում։ EMO-ի անհիմն օգտագործման դեպքում Օգտագործողի նկատմամբ կարող է կիրառվել պայմանագրային տուգանք մինչև 50,000 ՀՀ դրամի չափով, եթե նման օգտագործումը առաջացրել է վնաս, ծախս կամ սարքի վերագործարկման անհրաժեշտություն։
3.5.5. չօգտագործել չսերտիֆիկացված կամ վնասված ադապտերներ, ինքնաշեն փոխանցիչներ կամ փոփոխված միացման լուծումներ։ Եթե Օգտագործողը հանում է հոսանքի տակ գտնվող կոնեկտորը և դա պատճառահետևանքային կապով վնասում է ավտոմեքենան, կոնեկտորը կամ կայանը, նրա նկատմամբ կարող է կիրառվել պայմանագրային տուգանք մինչև 700,000 ՀՀ դրամի չափով և/կամ փաստացի վնասի հատուցման պահանջ՝ օրենքով թույլատրելի սահմաններում։
3.5.6. լիցքավորման ավարտից հետո ազատել լիցքավորման տեղը և խուսափել մեքենատեղի անհարկի զբաղեցումից։ Եթե Կատարողի սակագնով նախատեսված է պարապուրդի վճար, այն կարող է գանձվել Օգտագործողից միայն այն դեպքում, երբ դրա պայմանները նախապես ցուցադրվել են։
3.5.7. տեխնիկական անսարքության կամ ավտոմեքենայի վնասի կասկածի դեպքում, որքանով դա անվտանգ է և ողջամիտ, պահպանել ապացույցները, չփոփոխել սարքավորումների վիճակը առանց անհրաժեշտության, լուսանկարել խնդիրը և անհապաղ տեղեկացնել աջակցության ծառայությանը։
3.5.8. չհրապարակել կամ չտարածել կեղծ կամ ապակողմնորոշող տեղեկատվություն Ագրեգատորի, Կատարողի, լիցքավորման սարքերի կամ ծառայությունների վերաբերյալ և չհրապարակել գաղտնի տեղեկատվություն առանց լիազորության։
3.6. Ագրեգատորի պարտականությունները
3.6.1. իր տեխնիկական հնարավորությունների սահմաններում ապահովել ծրագրային ապահովման, Հավելվածի, կայքի, ADMIN PANEL-ի և աջակցության ծառայության պատշաճ աշխատանքը։
3.6.2. համակարգում ցուցադրել Կատարողի տրամադրած և համակարգին հասանելի արդիական տվյալները՝ սակագին, սարքի կարգավիճակ, նվազագույն պահուստավորում, հզորություն, գտնվելու վայր և այլ էական տեղեկություններ։
3.6.3. կիրառելի դեպքերում իրականացնել տեխնիկական միջոցներ՝ անսարք կայանի ցուցադրումը սահմանափակելու, վտանգավոր սեսիան դադարեցնելու, պարտքի կամ խախտման դեպքում մուտքը սահմանափակելու կամ կողմերին կարևոր հաղորդագրություն ուղարկելու համար։
3.6.4. անձնական տվյալների մշակման, պահպանման և պաշտպանության գործողություններ կատարել միայն իրավաչափ նպատակներով, անհրաժեշտ ծավալով և ՀՀ օրենքների պահանջներին համապատասխան։